කංචුකා ධර්මසිරි
ඡායාරූප : ඉෂාරා ධනසේකර
- නදීකා බණ්ඩාරගේ තෙත් භූමි කෘතිය ස්ථානගත කිරීමට සිදු වන්නේ මෙවැනි කලා සන්දර්භයක් තුළය. එය යම් ආකාරයක රංගනයක් වනවා සේම අභිවහන කලාවටද යම් ආකාරයක සම්බන්ධයක් දක්වයි. කැන්වසය කඩාගෙන එය තුළින් මතු වී පේ‍්‍රක්ෂකයා දෙස තියුණු ලෙස බලා සිටි ශ්නීමන් මෙන්ම නදීකා බණ්ඩාරද පේ‍්‍රක්ෂකයා දෙස තියුණු බැල්මක් හෙළයි. ඇගේ කෘතිය තුළ ස්ත‍්‍රියව නොනවත්වා, දීර්ඝ ලෙස ප‍්‍රචණ්ඩත්වයට ලක්වන ආකාරය නිරූපණය වේ. බලහත්කාරී ලිංගික ක‍්‍රියාවල සිට, ඔසප් වීම, දරුවන් වැදීම, ගබ්සාවන් වැනි ස්ත‍්‍රීන් මුහුණ දෙන අවස්ථා හරහා පේ‍්‍රක්ෂකයාව ගෙනයයි. එම රංගනය කුරිරුය, ප‍්‍රචණ්ඩය.
-කුඩා කල සිටම පවුල, පාසල, විවාහය වැනි හෙජමොනික සමාජ යාන්ත‍්‍රණ තුළ හසුරවනු ලබන ස්ත‍්‍රී ශරීර, දරුවන් ලැබීමට රෝහලට යන ස්ත‍්‍රින්ගේ ශරීර, ගබ්සාවට මුහුණපාන ස්ත්රිය, සංස්කෘතික කතිකා තුළත් වැඩිහිටි චිත‍්‍රපට සහ විවිධාකාර වූ තවත් සමාජයේ යාන්ත‍්‍රණයන් තුළ ස්ත‍්‍රියගේ ශරීරය පාලනයට ලක්කළ යුතු, පාලනය කළ යුතු දෙයක් ලෙස නිර්මාණය කෙරෙන, දකින ආකාරය නදීකා පෙන්නුම් කරන්නේ ඒවා වසාගෙන ඇති රොමෑන්තික මානයන් පාසාරු කරමිනි. කුරිරු රංගය කෘතියේ ඇන්තොනින් ආර්තෝ පෙන්වා දෙන පරිදි සංස්කෘතිය සහ සදාචාරයේ ආවරණ ඉරා දමා ඇතුළාන්තයෙන්ම නැගෙන විලාප, චලන සහ හැගීම් සමුදායක් තෙත් භූමි හරහා ඉදිරිපත් කෙරේ. එය ”ලස්සන” රංගයක් නොවේ. රුධිරය ගලා යන, කෑ ගැසීම්වලින් පිරි, ස්ත්රිය සෑම මොහොතකම මුහුණ පාන ප‍්‍රචණ්ඩත්වය පිළිබද ප‍්‍රකාශනයකි. මුල, මැද අග සහිත නාට්‍යයක් නැරඹීම කෙනෙකුගේ අභිප‍්‍රාය වූයේ නම්, මෙය එම බලාපොරොත්තුව සුන් කරන කෘතියකි.
-සමූහ ස්ත‍්‍රී ලිංගික හිංසනයන් වැඩිහිටි නාලිකා හරහා නරඹන සහ රසවිඳින පිරිස් සිටින සන්දර්භයක් තුළ (මේ මස මුලදී ඉන්දියාවේ සිද්ධ වූ දරුණු සමූහ ස්ත‍්‍රී ලිංගික හිංසනය සහ මිනී මැරීම වැඩිහිටි නාලිකාවල වැඩි වශයෙන් නරඹා ඇති බව වාර්තා වේ), එම හිංසනයන් පුරුෂ ෆැන්ටසියක් බවට පත්වන සන්දර්භයක් තුළ නදීකා ඇතුළු පිරිස එම ෆැන්ටසිය කඩා බිඳ දමති. ශ්නීමන් කැන්වසය කඩාගෙන පේ‍්‍රක්ෂකයා දෙස බලා සිටි ආකාරයට, නදීකා නාට්‍ය කලාව සහ අභිවහන කලාව අතර දෝලනය වන ”තෙත් භූමි” රංග කාර්යය හරහා නැවත නැවතත් ප‍්‍රචණ්ඩත්වයට ලක්වන ස්ත‍්‍රී ශරීරය පේ‍්‍රක්ෂකයාට සම්මුඛ කරවයි. එය කළුවර පේ‍්‍රක්ෂකාගාරයක් තුළ පහසුවෙන් අසුන් ගෙන නැරඹිය හැකි රංගනයක් නොවේ. එය සෑම දිනකම ස්ත්රිය මුහුණපාන ප‍්‍රචණ්ඩත්වය සහ නිෂේධනය අත්දැකීමට සිදුවන මොහොතකි. මෙම රංගනය ගැහැනියගේ පැවැත්ම පිළිබඳවම ප‍්‍රශ්නයකි. සමාජ සත්වයකු වශයෙන් ඇයව දකිනු ලබන ආකාරය, ඇගේ ශරීරය ප‍්‍රචණ්ඩත්වයට ලක්වන ආකාරය ගැන අඳුරු ප‍්‍රකාශනයකි. එය සෑම ආකාරයකම පුරුෂ ෆැන්ටසි බිඳ දමන්නකි. නිෂ්ක‍්‍රීය කර ඇති, බොහෝ විට දෙවැනි ගණයට දමා ඇති ස්ත්රිය පේ‍්‍රක්ෂකයාට අභිමුඛ කරවීමකි. ලාංකේය නාට්‍ය/අභිවහන රංග කලාව තුළ සිද්ධ කරන පෙරළියකි.
Read More
https://ravaya.lk/%E0%B6%9A%E0%B6%BD%E0%B7%8F%E0%B7%80-%E0%B6%AD%E0%B7%94%E0%B7%85-%E0%B7%83%E0%B7%8A%E0%B6%AD%E2%80%8D%E0%B7%8A%E2%80%8D%E0%B6%BB%E0%B7%92%E0%B6%BA-%E0%B7%83%E0%B6%9A%E2%80%8D%E0%B7%8A%E2%80%8D/
https://kanchuka.info/blog/
No comments:
Post a Comment